Cantar de Mío Cid. Folio 26v

Si uos quisieredes minaya quiero saber recabdo
Delos que son aqui e comigo ganaron algo
Meter los he en escripto e todos sean contados
Que si algunos furtare o menos le fallaren el auer me aura
                                                        a tornar
Aquestos myos vassalos que curian a valençia e andan arobdando
Ali dixo minaya conseio es aguisado

LXXVII

Mando los venir ala corth e a todos los iuntar
Quando los fallo por cuenta fizo los nonbrar
Tres mill e seys çientos auie myo çid el de biuar
Alegras le el coraçon e tornos a sonrrisar
Grado a dios mynaya e a santa maria madre
Con mas pocos yxiemos de la casa de biuar
Agora auemos riqueza mas auremos adelant
Si a uos ploguiere minaya e non uos caya en pesar
Enbiar uos quiero a castiella do auemos heredades
Al Rey alfonsso myo sennor natural
Destas mis ganançias que auemos fechas aca
Dar le quiero .C. cauallos e uos yd gelos leuar
Desi por mi besalde la mano e firme gelo Rogad
Por mi mugier e mis fijas si fuere su merçed
Quen las dexe sacar
Enbiare por ellas e uos sabed el mensage
La mugier de myo çid e sus fijas las yffantes
De guisa yran por ellas que a grand ondra vernan
A estas tierras estranas que nos pudiemos ganar
Essora dixo minaya de buena voluntad