Cantar de Mío Cid. Folio 42r

Vos agora legastes e nos vinjemos anoch
Myo huesped seredes çid campeador
E cras feremos lo que plogiere a uos
Beso le la mano myo cid lo otorgo
Essora sele omillan los yffantes de carrion
Omillamos nos çid en buen ora nasquiestes uos
En quanto podemos andamos en uuestro pro
Respuso mio çid assi lo mande el criador
Myo çid Ruy diaz que en ora buena nasco
En aquel dia del Rey so huesped fue
Non se puede fartar del tantol querie de coraçon
Catandol sedie la barba que tan aynal creçiera
Marauillan se de myo çid quantos que y son
Es dia es passado e entrada es la noch
Otro dia mannana claro salie el sol
El campeador alos sos lo mando
Que adobassen cozina pora quantos que y son
De tal guisa los paga myo çid el campeador
Todos eran alegres e acuerdan en vna Razon
Passado auie .iij. annos no comieran meior
Al otro dia mannana assi commo salio el sol
El obispo don iheronimo la missa canto
Al salir de la missa todos iuntados son
Non lo tardo el Rey la Razon conpeço
Oyd me las escuellas cuendes e yfançones