Cantar de Mío Cid. Folio 50r

E vio venir a diego e a fernando
Amos son fijos del conde don goçalo
Alegros myo çid fermoso sonrrisando
Venides myos yernos myos fijos sodes amos
Se que de lidiar bien sodes pagados
A carrion de uos yran buenos mandados
Commo al Rey bucar avemos arrancado
Commo yo fio por dios e en todos los sos santos
Desta arrancada nos yremos pagados
Mynaya albarfanez essora es legado
El escudo trae al cuello e todo espadado
Delos colpes delas lanças non auie Recabdo
Aquelos que gelos dieran non gelo auien logrado
Por el cobdo ayuso la sangre destellando
De .xx. arriba ha moros matado
De todas partes sos vassalos van legando
Grado a dios e al padre que esta en alto
E a uos çid que en buen ora fuestes nado
Matastes a bucar e arrancamos el canpo
Todos estos bienes de uos son e de uuestros vassallos
E uuestros yernos aqui son ensayados
Fartos de lidiar con moros enel campo
Dixo myo çid yo desto so pagado
Quando agora son buenos adelant seran preçiados
Por bien lo dixo el çid mas ellos lo touieron a mal