Cantar de Mío Cid. Folio 58r

Avn veamos el dia que vos podamos vengar
Hy iazen essa noche e tan grand gozo que fazen
Otro dia mannana pienssan de caualgar
Los de santesteuan escurriendo los van
Fata Rio damor dando les solaz
Dallent se espidieron dellos pienssan se de tornar
E minaya con las duennas yua cabadelant
Troçieron alcoçeua a diestro de santesteuan de gormaz
O dizen bado de Rey alla yuan posar
Ala casa de berlanga posada presa han
Otro dia mannana meten se a andar
A qual dizen medina yuan albergar
E de medina a molina en otro dia van
Al moro auengaluon de coraçon le plaz
Saliolos a Reçebir de buena voluntad
Por amor de myo çid Rica cena les da
Dent pora valençia adelinechos van
Al que en buen ora nasco legaua el menssaie
Priuado caualga a Reçebir los sale
Armas yua teniendo e grant gozo que faze
Myo çid a sus fijas yua las abraçar
Besando las a amas tornos de sonrrisar
Venides mis fijas dios uos curie de mal
Hyo tome el casamiento mas non ose dezir al
Plega al criador que en çielo esta
Que uos vea meior casadas daqui en adelant
De myos yernos de carrion dios me faga vengar
Besaron las manos las fijas al padre