Cantar de Mío Cid. Folio 17r

E a galue nol cogieron alla
Para calatayuch quanto puede se va
El campeador yual en alcaz
Fata calatayuch duro el segudar

XL

A mynaya albarfanez bien landa el cauallo
Daquestos moros mato .xxx iiij.
Espada taiador sangriento trae el braço
Por el cobdo ayuso la sangre destellando
Dize mynaya agora so pagado
Que a castiella yran buenos mandados
Que myo çid Ruy diaz lid campal a vençida
Tantos moros yazen muertos que pocos biuos a dexados
Ca en alcaz sjn dubda les fueron dando
Yas tornan los del que en buen ora nasco
Andaua myo çid sobre so buen cauallo
La cofia fronzida dios commo es bien barbado
Almofar a cuestas la espada en la mano
Vio los sos commos van alegando
Grado a dios aquel que esta en alto
Quando tal batalla auemos arancado
Esta albergada los de myo çid luego la an robada
De escudos e de armas e de otros aueres largos
Delos moriscos quando son legados ffallaron .D. x cauallos
Grand alegreya va entre essos xristianos
Mas de quinze de los sos menos non fallaron
Traen oro e plata que non saben recabdo