Cantar de Mío Cid. Folio 17v

Refechos son todos esos xristianos con aquesta ganançia
A sos castiellos alos moros dentro los an tornados
Mando myo çid aun que les diessen algo
Grant a el gozo myo çid con todos sos vassalos
Dio a partir estos dineros e estos aueres largos
En la su quinta al çid caen .C. cauallos
Dios que bien pago a todos sus vassallos
Alos peones e alos encaualgados
Bien lo aguisa el que en buen ora nasco
Quantos el trae todos son pagados
Oyd mynaya sodes myo diestro braço
Daquesta Riqueza que el criador nos a dado
A uuestra guisa prended con uuestra mano
Enbiar uos quiero a castiella con mandado
Desta batalla que auemos arancada
Al Rey alfonsso que me a ayrado
Quierol enbiar en don .xxx. cauallos
Todos con siellas e muy bien enfrenados
Sennas espadas delos arzones colgadas
Dixo mynaya albarfanez esto fare yo de grado

XLI

Euades aqui oro e plata vna vesa lenna
Que nada nol minguaua
En santa maria de burgos quitedes mill missas
Lo que Romaneçiere daldo a mi mugier e a mis fijas