Cantar de Mío Cid. Folio 71v

En mano prenden las astas delos fierros taiadores
Estas tres lanças traen senos pendones
E derredor dellos muchos buenos varones
Hya salieron al campo do eran los moiones
Todos tres son acordados los del campeador
Que cada vno dellos bien fos ferir el so
Feuos dela otra part los yfantes de carrion
Muy bien aconpannados ca muchos parientes son
El Rey dioles fieles por dezir el derecho e al non
Que non varagen con ellos desi o de non
Do sedien enel campo fablo el Rey don alfonsso
Oyd que uos digo yfantes de carrion
Esta lid en toledo la fizierades mas non quisiestes vos
Estos tres caualleros de myo çid el campeador
Hyo los adux a saluo a tierras de carrion
Aued uuestro derecho tuerto non querades vos
Ca qui tuerto quisiere fazer mal gelo vedare yo
En todo myo Reyno non aura buena sabor
Hya les va pesando alos yfantes de carrion
Los fieles e el Rey ensennaron los moiones
Librauan se del campo todos aderredor
Bien gelo demostraron a todos .vj. commo son
Que por y serie vençido qui saliesse del moion
Todas las yentes esconbraron aderredor
Mas De .vj. astas de lanças que non legassen al moion
Sorteauan les el campo ya les partien el sol
Salien los fieles de medio ellos cara por cara son