Cantar de Mío Cid. Folio 65r

Veriedes aduzir tanto cauallo corredor
Tanta gruessa mula tanto palafre de sazon
Tanta buena espada con toda guarnizon
Recibiolo myo çid commo apreçiaron enla cort
Sobre los dozientos marcos que tenie el Rey alfonsso
Pagaron los yfantes al que en buen ora nasco
Enprestan les delo ageno que non les cumple lo suyo
Mal escapan iogados sabed desta Razon

CXXXVIII

Estas apreçiaduras myo çid presas las ha
Sos omnes las tienen e dellas penssaran
Mas quando esto ouo acabado penssaron luego dal
Merçed ay Rey sennor por amor de caridad
La Rencura mayor non seme puede olbidar
Oyd me toda la cort e peseuos de myo mal
Delos yfantes de carrion quem desondraron tan mal
A menos de Riebtos no los puedo dexar

CXXXIX

Dezid que uos mereçi yfantes en juego o en vero
O en alguna Razon aqui lo meiorare a juuizyo dela cort
A quem descubriestes las telas del coraçon
Ala salida de valençia mis fijas vos di yo
Con muy grand ondra e averes a nombre
Quando las non queriedes ya canes traydores
Por que las sacauades de valençia sus honores
A que las firiestes a çinchas e a espolones
Solas las dexastes enel Robredo de corpes
Alas bestias fieras e alas aues del mont
Por quanto les fiziestes menos valedes vos